මාත් මගේ හිතත් අරන් නුඹ ඈතක ගියා
කාත් කවුරුවත් නැති මට තනිකම ළඟ තියා
ඈත් මෑත් කර හදවත කවුළුපියන් අයා
රෑත් දහවලෙත් විමසමි යළි ඒ දැයි කියා
කවියක පදයක් වාගෙයි මගේ හිතට ඔයා
ඔබ නාමෙන් හිත මත්තේ ගීයක් ඇත ලියා
ගීයට තනුවක් විලසින් ආවොත් මා සොයා
සදාකල්ම රැක ගන්නෙමි පෙම් ගීතය ගයා
තරු ඉහිරුණු අහස දෙසට යුග දෙනෙතම අයා
වරුවක් අපි තරු ගනිමුද තරුවක පෙම ලියා
වැතිරී ඔය උරතල මත උණුසුම් සුව සොයා
සැනහෙන්නම් මගේ හිතම ඔබ ගාවින් තියා
සයුරු රළට වෙරළ විලස ඔබ පෙර මග රැඳෙමි
ගිමන නිවන රුකක් ලෙසින් ඔබට සෙවන සදමි
කවියට එළිවැටක් වෙලා ඔබ හිත මත වෙළෙමි
සතුටක් වී දිවිය පුරා ඔය ඇස් මත නිදමි
තණ නිල්ලක පිණි බිඳු මත උදෑසනක දුවමි
හසරැල්ලක සඟවා ගෙන විත් පිණි බිඳු ඉසිමි
සිහිලැල්ලක තවරා මුදු හාදු කොපුල තබමි
දඟ කෙල්ලක විලස සදා ඔබ ගාවම රැඳෙමි
තරුවකවත් නොමැති එළිය ඔය දෙනෙතේ දකිමි
දවසක්වත් ඔබව අතැර ඉවතක මම නොයමි
කිරුළක් ලත් රැජිනක ලෙස හද විමනේ රැඳෙමි
මොහොතක්වත් අතැර ගියොත් ඔබ නාමෙන් මියෙමි
No comments:
Post a Comment