නුඹ දුරක ඇදුනා ...

මහ හීන හුඟක් හිත මතට ගෙනත් 
ඇයි දුරින් බලන් උන්නේ 
නෙතු දෑල පුරා ඔය රුවම මවා ඇති 
බැව් නැතුවද දන්නේ 
ආදරෙන් හිනාවෙන ඇස් මත මොනවද 
හොරෙන් ලියා යන්නේ 
ඔය හිතේ ඉඩක් ගෙන ඔබෙම වෙලා 
හිනැහෙන්න බලා ඉන්නේ 

කතා කියන ඔය ඇස් දෙක අස්සේ 
ගොඩක් කතා ලියලා 
දුරින් බලා ගෙන සිනා සලන විට 
එන්න හිතයි දුවලා 
සියුම් ඇඟිලි තුඩු දරාන දෝතින් 
සුමුදුව පිරි මැදලා 
සපථ කරන්නම් භාවෙන් භවේ ඔබ 
මගෙම වෙන්න කියලා 

හීන් හිනා මුව මඩල පුරෝගෙන 
බලා හිඳිනු පෙනුනා 
ආත්මයෙම ඔබ මා සමගින් දුර 
එන්න ඇතැයි දැනුනා 
වාන් දමන පෙම් සිතුවිලි ගඟුලේ 
තෙමෙන්න මට හිතුනා 
හාංකවිසියක් නොදන්න ගානට 
නුඹම දුරක ඇදුනා