එදා වාගේ අදත් මහ වැස්ස වැටෙනවා
ලඟින් උන් ඒ දවස් මතකයට එබෙනවා
මතක අතුරෙන් අවුත් උණුහුමක් දැනෙනවා
උණුහුමට ගුලි වෙන්න එන්න මට හිතෙනවා
මතකයන් අතර හිඳ ඔබ සිනා නගනවා
කඳුළු එනකල් හිනා නැගු අයුරු මැවෙනවා
සිත රිදී ආයෙමත් උණු කඳුළු නැගෙනවා
හිනාවක් සොයාගෙන එන්න මට හිතෙනවා
කවුළුවෙන් මට හොරෙන් සුළං රැලි එබෙනවා
සුළං රැල්ලේ එතී ඔබෙ හඬ ඇසෙනවා
එදා කියූ වදන් යළි හිතේ පොදි ගැහෙනවා
පෙර වගේ ළඟ ඉන්න එන්න මට හිතෙනවා
පින්න මල් පෙර වගේ ලන්ද කොන පිපෙනවා
දo ගහේ කුරුල්ලන් තවම ගී ගයනවා
ඔබ උන්නු තැන හදේ අදත් ඉඩ තියෙනවා
ඔබ එතැයි හිතන් මා තවම මග බලනවා 
No comments:
Post a Comment