සේන් ගඟ ළඟ
මතක විජිතයෙ ඔබේ සුවඳම දැනෙනවා
පුරුදු සුවඳට ඉව කරන සිත මතක අතරේ දුවනවා
හොරෙන් වාගේ ඇවිත් ඔබ යළි මගේ කොපුලත සිඹිනවා
මතක මාවත දිගේ ඇවිදන් යළිත් එන්නට සිතෙනවා
සේන් ගඟ ළඟ පිපී හිනැහෙන රොබරෝසියා මල් ගසේ
සුවඳ සුළඟට මුදාලයි ලොබ නැතිව තවමත් පෙර ලෙසේ
ගං දියේ ඈතට ගසා ගෙන ගොසින් සැඟවෙන මලක් සේ
හද ඉමේ සිට නිති සිනාසෙන මතක සඟවන්නේ කෙසේ
එදා සෙනෙහෙන් මෙ'ගං ඉවුරේ වරු ගණන් අප ඉන්නැති
මෙදා තනිවම මෙ'මං වැළපෙන අයුරු මෙ ගඟ දන්නැති
සේන් නදියට වඩා වැඩියෙන් මෙමා කඳුලැලි බොන්නැති
මියෙන තුරු මට දරා ගන්නට ඔබම දුන් කඳුලැලි ඇති
No comments:
Post a Comment